Un día no Teatro, un día máis na procura da verdade sobre o ser humano

Onte foi unha xornada na que toda secundaria pasou polo teatro. Profesores e alumnos compartiron un par de representacións en homenaxe a Roberto Vidal Bolaño, un dos mellores dramaturgos da Literatura Galega contemporánea. A Aula do teatro do noso centro representou e fixo propias Agasallo de sombras que levaron a cabo alumnos/as de 1º de Bacharelato, e os alumnos/as de 4º ESO B escenificaron A ópera de a patacón.  Non quixeramos deixar pasar esta ocasión sen realizar logo unha breve reflexión sobre o acontecido, destacando a importancia e valores desta experiencia creativa e didáctica que fomos quen de vivir.

O TEATRO UN EXERCICIO NA PROCURA DA VERDADE

Cando realizamos unha obra de teatro nun centro de ensino todos saímos gañando da experiencia. O centro precisa educar tamén aos seus alumnos/as como futuros espectadores, ofertándolles, dándolles as claves coas que achegarse a calquera proposta dramática,  acompañalos nese proceso que procura en cada representación unha parte da verdade que está por descubrir, que temos que axudar a descubrir a cada alumno/a como unha experiencia didáctica necesaria para calquera ser humano do século XXI.

Os alumnos/os que presencian o espectáculo, futuros consumidores de produtos teatrais que agudiza a súa capacidade e edúcaos como espectadores dispostos á reflexión do que ven, observar con espírito crítico unha obra dun xénero onde a opinión é esencial, e do que naceu o cinema, polo tanto produtos que se consumen día a día, en moitas ocasións sen criterio, sen reflexión.

Aos profesores/as que lles ofrece unha ferramenta de traballo nas aulas de primeira magnitude ao ser un instrumento onde os protagonistas, nunca mellor dito, son realmente os propios alumnos/as, tanto os que actúan como os que son espectadores. O teatro, un lugar para ver e facer medrar o espírito crítico dos nosos alumnos/as, as capacidades de expresión e comprensión póñense de manifesto e é un espazo novo para educar a responsabilidade e a madureza dos propios alumnos/as.

Aos que representan a obra élles especialmente rendible como experiencia por tratárense dunha tarefa didáctica moi completa que parte do propio coñecemento sobre un mesmo e de como proxectamos o noso eu cara aos demais, pasando por dinámicas de mellora da expresión e comunicación social, de creación e imaxinación, de memoria e de improvisación notables.